O Concello prevé obras para o local social de Ouzande:::

O alcalde da Estrada, Xosé Dono, deu onte información sobre as obras que se prevén no noso municipio nos próximos meses. Entre estas actuacións mencionouse o local de Ouzande, unha obra demandada desde hai moito tempo pola sociedade parroquial. Cambio de ventás, revestimento do exterior ou mesmo a mellora da parte superior para a súa optimización son algunhas das reclamación que se teñen feito nos últimos anos.
O local social de Ouzande, sito nos baixos do palco, é un dos espazos do rural estradense con maior densidade de actividade ao longo de toda a semana. Dende as distintas votacións ata as máis variadas actividades de carácter sociocultural son as que se desenvolven nuns poucos metros cadrados que reclaman unha atención urxente.
O financiamento para estas actuacións anunciadas polo alcalde responden ao plan Feil, ou plan anticrise do Estado e contará con 2,36 millóns de euros.
A proposta municipal pretende darlle traballo a 67 operarios que pertencerán ás empresas locais que traballarán no saneamento de distintas parroquias e na recuperación das casas escola e locais sociais. Para esta segunda actuación anunciouse un investimento de 225.000 euros. Estes traballos dirixiránse para as cubertas dos locais de Souto, Moreira, Matalobos, Cereixo, Couso, Arca, Callobre, Vinseiro e Oca. Adxuntamos as declaracións de Dono en Estrada Tv.

Un nutrido grupo de persoas realizan a visita guiada á igrexa de Ouzande dentro das Xornadas de Historia da Estrada:::

Organizadas pola Concellaría de Turismo do Concello da Estrada, a pasada fin de semana celebráronse as I Xornadas de Historia da Estrada. As actividades comezaron o venres 15 ás 7 da tarde na Sala de Exposicións de Caixanova e foron presentadas por Raquel Doce, teniente de alcaldesa.
Na primeira das palestras falou a catedrática en filoxía románica Mercedes Brea sobre o mundo trobadoresco. Animou ao público a perderlle o medo aos textos medievais e deu a coñecer o que se sabe sobre a lírica dos irmáns Pai Soarez de Taveirós e Pero Velho de Taveirós. Naturais desta parroquia veciña, naceron nas primeiras décadas do século XIII. Consérvanse quince cantigas de Paio no Cancioneiro da Ajuda e unha de Pero que se localizou no Cancioneiro da Biblioteca Nacional de Lisboa.
Anselmo López Carreira que é profesor de historia medieval na UNED explicou a existencia do Reino da Galicia medieval e o silenciamento que se fixo no século XIX da nosa historia por motivos políticos.
Un nutrido grupo de persoas foron as que realizaron a visita guiada á igrexa de Ouzande nunha xornada marcada pola choiva. Guiou a expedición Xosé Luna Sanmartín quen falou dos elementos máis característicos da nosa igrexa, matizando que A Estrada conta con outras vinte igrexas con orixe e restos románicos, sendo a de Ouzande unha das mellor conservadas.
Xa pola tarde do sábado pechou este guía as Xornadas cunha conferencia sobre o románico na comarca e destacando a importancia deste no contexto mundial, acentuou á nosa comarca como "a maior fábrica de románico de Europa", sen nada que envexarlle a Silos ou outros monumentos que figuran nos libros de texto dos institutos.

No mundo nom me sei parelha,
mentre me for como me vai;
ca ja moiro por vós, e ai!,
mia senhor branca e vermelha,
queredes que vos retraia
quando vos eu vi em saia?
Mao dia me levantei,
que vos entom nom vi feia!

E, mia senhor, des aquelha,
me foi a mi mui mal di' ai!
E vós, filha de Dom Pai
Moniz, en bem vos semelha
d' haver eu por vós garvaia?
Pois eu, mia senhor, d' alfaia
nunca de vós houve nem hei
valia d'ua correia!

— Cantiga da garvaia, Paio Soares Taveirós

Unha árbore cae no Tallo tralo temporal da pasada madrugada:::

O temporal de vento e auga trouxo complicacións na madrugada deste mércores ao xoves. Aínda que as comarcas costeiras foron as máis afectadas polos fortes refachos, tamén no interior nos vimos afectados.
Ademais dos cortes de luz houbo unha incidencia no Tallo ao caer un piñeiro sobre a pista que une a estrada de Codeseda coa de Ouzande.
Ao mediodía de hoxe xa estaba transitable esta pista que diariamente é usada por numerosos automóbiles para acceder á vila pola zona de Bedelle.

Visita á igrexa de Ouzande e á torre de Guimarei este sábado nas I Xornadas de Historia da Estrada:::

O vindeiro venres 15 de xaneiro comezarán na Estrada as I Xornadas de Historia da Estrada, un evento que versará sobre a historia medieval da comarca como recurso ou reclamo turístico. Así llelo presentou onte a Concelleria de Turismo da Estrada, Raquel López, aos medios de comunicación.
A cita será ás sete da tarde na Sala de Exposicións de Caixanova, na Rúa Principal da vila. Falará Anselmo López Carreira do contexto político do medievo en Galicia. E a catedrática en filoloxía románica da Universidade de Santiago, a estradense Mercedes Brea, tratará o mundo trobadoresco destacando figuras coma Pai Soares de Tabeirós.
No sábado é cando se ten prevista a visita á torre de Guimarei e á igrexa de Ouzande. A cita será ás 10.30 na Praza do Concello da Estrada para iniciar unha ruta a pé que descobra o patrimonio material medieval do concello. O roteiro deteráse nestes dous baluartes do medievo.
Xa na tarde do sábado está previsto que ás sete se proxecte na Sala de Exposicións de Caixanova un documental de Xosé Luna sobre a arte románica na comarca. Ao remate do video, o seu autor ofrecerá unha conferencia sobre esta temática.
Segundo o departamento municipal de turismo a asistencia a estas actividades é de balde e está aberta a todo o mundo. Esta iniciativa forma parte das actividades de promoción dos recursos turísticos da Estrada. Así, tamén se vén de proxectar unha guía turística sobre o concello que dá boa conta dos recursos turísticos que fornece a nosa parroquia aos visitantes coma a propia igrexa e o seu contorno como o conxunto dos muíños da Fervenza.
Tamén se anunciou que esta guía vai ser presentada oficialmente en FITUR, a feira internacional do turismo,o día 20 deste mes en Madrid.

Remata o temporal de frío pero vén outro de vento e auga::::

Logo de tres día con neve, xeadas e temperaturas con valores negativos, enfrontámonos a unha borrasca que traerá vento, chuvia pero tamén unha pronunciada subida das temperaturas. Algúns lugares nos que houbo que botar sal e que permaneceron moito tempo cubertos de xeo e neve volven á normalidade. Velaquí algunhas fotografías destas vías; no Picoto, na Costa da Labrada, no Redondo. Para ver a información do tempo clica na sección de METEOGALICIA no lateral dereito desta páxina.

Ouzande amenceu cuberto dun gran manto de neve:::

Hoxe, venres 8 de xaneiro, será un día recordado polas dificultades para circular pola comarca debido ás placas de xeo, pero tamén por ser un día no que a neve deixou imaxes ben fermosas. Agora os problemas están nesas zonas nas que non dá o sol e o xeo fai perigoso circular tanto a pé coma en coche. Nalgúns puntos xa se botou sal para paliar esta situación, coma na zona da costa da Labrada. As previsións metereolóxicas apuntan a que a vaga de frío continuará aínda uns días entre nós.
ver información do tempo de meteogalicia

Chega a neve a OUzande:::

Segundo a predición de METEOGALICIA para hoxe hai posibilidade de neve na parroquia. Ás doce do mediodía caen as primeiras folerpas en OUzande polo que dentro dunhas horas informaremos da situación na parroquia e publicaremos as fotos que, agardamos, nos forneza este frío día.